Flikk Flakk – Vestmannaeyjar

Flikk Flakk raunveruleikaþáttur á Rúv, sjá einnig Flikk Flakk á Höfn í Hornafirði.
Hugmyndin er að nota hönnun sem drifkraft samfélagslegrar þróunar.   Verkefnið byggir á hugmyndafræði „Participation design“ – Þátttökuhönnun, þar sem notandinn tekur þátt í mótun hugmyndar og framkvæmd. Eftir hugarflugsfundi með íbúum, fer hönnunarvinnan af stað, þar sem leitast er við að skapa notendavænt umhverfi með einföldum miðlum og efnivið úr umhverfinu. Markmið verkefnisins er að máta ákveðna notkun vannýtt svæðis, þar sem auðvelt er að halda áfram með nálgunina eða breyta henni ef reynslan sýnir annað.

Tell me and I´ll forget
Show me and I´ll remember
INVOLVE ME and I´ll understand

Hönnunarteymi ásamt DLD, Örn Smári Gíslason grafískur hönnuður, Egill Egilsson iðnhönnuður og Sigurður Þorsteinsson iðnhönnuður, sem jafnframt er hugmyndasmiður þáttanna ásamt Þórhalli Gunnarssyni þá starfsmaður hjá Rúv.

New nordic Landscapes – Shanghai

Árið 2009 var Dagnýju falið verkefnið að hanna sýningarsvæði New nordic Landscapes.  Sýningin var samnorræn landslagsarkitektúrsýning haldin í tengslum við Expo í Shanghai árið 2010. Verkefnið var stutt af Norrænu ráðherranefndinni og sýningarstjóri var Kjersti Wikström.  Hvert land fékk úthlutað Furnibloom borði og 4 stólum til að kynna verkefni sem valið var á sýninguna.  Með hverju verki var unnið hljóðverk sem tengdist verkefninu, sem Hafdís Bjarnadóttir tónskáld vann í samráði við höfunda svæðanna. Þema Expo var “Better Cities better live”, eða “betra borgarumhverfi betra líf”.  Sýningunni New Nordic Landscapes sem var staðsett á torgi við Nordic Lighthouse sameiginlegu kynningarhúsi Norðurlandanna, var ætlað að varpa ljósi á mikilvægi og möguleikum landslagsarkitektúrs í mótun manngerð umhverfis, ekki síst með tilliti til vistvænna lausna á aðkallandi vanda heimsins og þörfina á nýrri stefnu í meðferð auðlinda.

Sameiginlegt tákn Norrænu ráðherranefndarinnar er svanurinn, einnig  græna norræna vottunarmerkið,  sóltjöldin voru hönnuð með þetta í huga að undir verndarvæng svansins stæðu borðin og stólarnir með verkunum.  Sýnendur gátu nýtt sér þrívíða möguleika á framsetningu í borðum og stólum, sýnt áferðir og prufur og hljóðið bætti svo fjórðu víddinni við og gáfu sérstaka stemmingu við hvert borð.  Verkið sem valið var frá Íslandi var Hellisheiðavirkjun, en verkefnið var unnið á Landslagi.
Teymið sem kom að sýningunni auk Dagnýjar, Hafdísar og Kjersti voru, Uwe Wütherich arkitekt, Lian Ma arkitekt, Sera Guo grafískur hönnuður, Mr Gong verktaki og listamaður.

Gengið á gleri og grjóti

Á Íslandi fellur til um 6000 tonn af drykkjargleri árlega, sem er mulið og notað í landfyllingar og urðað.
Vatn er verðmæti sem við viljum halda inn í vistkerfinu og ofanvatnslausnir þar sem hugað er sérstaklega að þessu er krafa samtímans.
Eiginleikar efnisins að hleypa vatni í gegnum sig ásamt því að nota innlent malarefni og endurunnið hráefni, gerir vöruna sérlega áhugaverða, sem vistvæna nálgun, auk þess sem hægt er að leika sér með margbreytiliegar áferðir.

Verkefnið Gengið á gleri og grjóti, er sprottið úr hugmynd frá árinu 2010 þegar undirrituð var að vinna að hönnun Hörputorgsins og  er búið að vera í þróun með hléum síðan.  Um er að ræða yfirborð úr annars vegar malarefni og hins vegar gleri.   Malaryfirborðið hefur verið vottað erlendis og er tilbúið til notkunar, en gleryfirborðið hefur verið í þróun, þar sem aðferðir til að tromla það og þurrka hafa verið prufaðar.  Efnið var fyrst kynnt í Toppstöðinni á Hönnunar Mars árið 2012.

Samstarfsaðilar verkefnisins fram að þessu hafa verið Endurvinnslan, Gnýr , Garðvélar og Þorleifur Geirsson.