Geysir í Haukadal

Í janúar 2014 skilaði DLD tillögu í samkeppni um svæði Geysis í Haukadal.  Bláskógabyggð hlaut styrk úr framkvæmdasjóði ferðamannastaða til að halda keppnina, í samstarfi við  Arki­tekta­fé­lag Íslands og Félag Landslagsarkitekta en dómnefnd auk þeirra skipuðu, Land­eig­enda­fé­lag Geys­is ehf og ríkið. Hér má sjá niðurstöðu dómnefndar.

Meðfylgjandi er greinargerð með tillögu DLD

Aðstoð við teiknivinnu:  Julia Woelcher landslagsarkitekt og Heiða Hrund Jack landslagsarkitekt.

Geyssisvæðið -heitur staður
Greinargerð

Inngangur
Ferðalag að náttúruperlu, hvar byrjar það og endar? Byrjar það kannski  í huganum, á netinu,  og hvernig er svo ferðalagið frá því sest er upp í bílinn eða rútuna? Í tillögunni er unnið með upplifun ferðamannsins þegar hannr nálgast Geysissvæðið akandi, hvernig hann er leiddur á þægilegan máta í gegnum mismunandi upplifanir á svæðinu, þar til hann yfirgefur svæðið með góða minningu í huga. Gengið er úr frá því að vernda náttúruperluna og stuðla að virðingu við hana.

Markmið
Meginþema tillögunnar er að vinna með óhindrað flæði á svæðinu:

• flæði vatns á hverasvæði án hindrana
• flæði fólks um svæðið án hindrana bílaumferðar
• flæði þjóðvegar án truflunar frá gangandi og akandi vegfaranda
• flæði akandi umferðar til og frá svæðinu – rútu- og bílastæði

Markmiðið er að byggja upp eftirvæntingu, skapa spennandi upplifun, og veita gott aðgengi að sem flestum hverum á svæðinu. Leitast er við að skapa virðingu fyrir náttúrunni, að auka öryggi ferðamanna og móta einstakt svæði þar sem heita vatnið er í aðalhlutverki.

Skipulagstillaga
Meginhugmynd skipulagstillögunnar er að skapa aðgengi þar sem mismunandi umferð getur flætt óhindrað og án skörunar.

Útgangspunkturinn er að skapa auðvelt aðgengi frá núverandi þjónustukjarna að hverasvæðinu, með því að lækka þjóðveginn og byggja brýr yfir hann fyrir gangandi umferð.
Við þjónustukjarnann er mótað torg þar sem gönguleiðir að hverasvæðinu byrja og enda. Gjáin sem myndast við að lækka þjóðveginn gerir það að verkum að eina leiðin að svæðinu frá þjónustukjarnanum er yfir brýrnar. Þannig mótast aðgangsstýring sem mætti tengja gjaldtöku. Hæðin á núverandi svæði helst óbreytt þar sem brýrnar enda og einungis er reiknað með að lækka veginn. Torgið verður hjarta svæðisins með útsýni að Strokki og hverasvæðinu öllu.

Akandi umferð
Þjóðvegurinn liggur óhindrað um gjá undir göngubrýrnar, en tvær innkeyrslur frá þjóðvegi að þjónustubyggingum og byggðakjarna verða að austan- og vestanverðu. Auk þess að auðvelda aðgengi gangandi gesta minnka sjónræn áhrif og umferðarniður . Áhrifaríkt verður að nálgast svæðið frá þjóðveginum þar sem gufa stígur upp frá torginu og vatn seytlar niður stoðveggina sem með tímanum verða mosavaxnir.
Gert er ráð fyrir að þjónustubyggingin verði stækkuð til suðurs og núverandi íbúðarhús aftan við hana flytjist af svæðinu. Þá opnast möguleiki á að leggja þjónustuveginn í gegnum svæðið að sunnanverðu þannig að gott flæði verði milli bílastæðakjarna og að þjóðvegi. Gert er ráð fyrir að flytja bensíndælur að þessum vegi. Áhaldahús verður sunnan við nýja veginn við núverandi lagersvæði.
Þrír bílastæðakjarnar liggja út frá þjónustuveginum og er gert ráð fyrir að rútur geti lagt frá báðum áttum og haldið áfram í beinni akstursstefnu. Í tillögunni er gert ráð fyrir 18 rútustæðum og 233 bílastæðum.

Torgið – upplifun og fræðsla
Heitavatnslækirnir, sem nú enda úti í skurði, eru leiddir inn á torgið. Lækirnir eru sýnilegir á yfirborðinu en hverfa undir yfirborð þar sem helstu göngustefnur þvera. Á leið inn á hverasvæðið næst torginu er vatnið leitt í borðhæð, þannig að hægt sé að snerta það. Á bakaleiðinni er hægt að enda í fótabaði á Torginu. Vegna landhalla verður sethæð breytileg og hentar fótabaðið því jafnt fullorðnum sem börnum. Frá fótabaðinu rennur lækurinn áfram niður með stíg að bílastæði og endar í sama skurði og fyrir breytingar.

Gert er ráð fyrir stækkun hótelsins í átt að torginu. Veitingastaðir á svæðinu hafi aðgang að útiveitingaaðstöðu á torginu sem rammast inn með hraunhleðslum með setkanti að innanverðu en hærri að utanverðu og grasi sem hallar á móti dvalarsvæði. Tröppur fyrir miðju torgi leysa hæðarmun og nýtast einnig sem setsvæði. Hreyfihamlaðir eiga auðvelt aðgengi um allt torgið.

Fræðsluskilti verða öll staðsett á torginu. Einungis nöfn á hverum og lágmarksupplýsingar verða inná hverasvæðinu. Hlaðnir veggir með upplýsingaskiltum mynda stefnu í átt að inngangi inn á hverasvæðið.
Á skiltunum verða kort og hagnýtar upplýsingar í máli og myndum.

Kortaskilti
Yfirlitskorti yfir nöfn hveranna og tegundaflokkun.
Jarðfræðiskilti
Jarðfræði Geysissvæðisins útlistuð með skýringarmyndum og texta.
Söguskilti

Fjalla í máli og myndum hvernig menning svæðissins tengist tilvist hveranna.
Varúðarskilti
eru staðsett nálægt inngangi inn á svæðið. Þar er fólki boðið að snerta vatnið í handlauginni  um leið og það er varað við brunahættu innan svæðissins. Þá er því boðið að fara í fótabað í bakaleiðinni.

Þjónustuskilti
Vakin er athygli á allri þjónustu á svæðinu sem og gönguleiðum og merkum stöðum í nágrenni svæðissins.
Göngustígar
Stíganetið byggir á hugmyndinni um óhindrað flæði vatns og fólks. Stígakerfið skiptist í þrjár tegundir stíga; aðalstígur úr trefjasteypu, timburstígar og malarstígar.

Stígum á hverasvæðinu er lyft frá yfirborðinu svo vatn frá hverunum geti flætt í eigin farvegi. Fólksflæðið um göngustíganetið er hringrás. Þannig ber svæðið meiri umferð virðist ekki eins mannmargt, þar sem fólk mætist lítið á leiðinni. Meginleiðin að vestanverðu er lægri í landinu en sú eystri, þannig er ekki bein sjónlína á milli stíganna. Straumþunginn er nokkuð ákveðinn á leiðinni upp að Strokk og Geysi, með fáum útúrdúrum en á bakaleiðinni kvíslast umferðin meira um svæðið.  Með reglulegu millibili verður komið fyrir bekkjum við stígana. Auk þess verður myndað sérstakt útsýnis- og dvalarsvæði við Strokk og önnur áherslusvæði.  Við Geysi verður  upphækkaður stallur að norðanverðu þannig að horfa megi ofan í hann.

Timburstígar hlykkjast út frá meginstígnum og veita aðgengi að hverum á sunnanverðu svæðinu.Breyta má legu þeirra eftir aðstæðum.

Aðalstígur og timburstígar eru aðgengilegir hreyfihömluðum, en malarstígar liggja um brattari svæði. Hægt er að ganga að Konungssteinunum og horfa yfir svæðið úr sætinu „Kóngur um stund“, tilhoggnum steini við enda stígsins.

Hringrásin endar svo á torginu við fótabaðið.

Afmörkun hverasvæðis er óbreytt nema við Háahver og meðfram göngustíg að tjaldsvæði. Hægt er að fara út fyrir afgirt hverasvæðið á tveimur stöðum í Laugarfjalli,. Þaðan liggjaútivistarstígar um fjallið, sem leiða að útsýnisstöðum, tjaldsvæði ogbænum Laug.

Gert er ráð fyrir að Laug verði áningarstaður með kaffihúsi og baðhúsi aftan við húsatóftina.

Stígakerfið er því samhangandi net sem tengir alla staði sem snúa að þjónustu ferðamanna á svæinu.

Efnisval og tæknilegar lausnir
Aðalstígurinn er gerður úr 8 cm þykkri trefjasteypu sem situr ofan á járnagrind. Grindin er borin uppi af stálbita sem er lyft frá jörðu. Styrkur stálbitans gerir það að verkum að hægt að nota færri undirstöður, sem kostar minna jarðrask. Gert er ráð fyrir að leggja snjóbræðslu  í steypta stíginn. Meðfram aðalstígnum er leiðandi armur með stálþræði sem undirstrikar að ekki megi fara út af stígnum. Áhorfendasvæði við Strokk er einnig úr trefjasteypu, sem og önnur útskot við hverina á meginleiðinni.
Armar ganga út úr aðalstígnum með reglulegu millibili. Milli þeirra er strengdrur stálþráður sem undirstrikar að ekki megi fara út af stígnum. Þetta er gert til að hlífa viðkvæmum gróðri og jarðmyndunum á svæðinu og til að vernda gesti gagnvart hættum.
Lýsing er undir aðalstígnum og markar brúnirnar á honum, án þess að lýsa í augu fólks eða trufla stjörnu- og norðurljósadýrð.  Á sama hátt verður gert ráð fyrir óbeinni lýsingu á torginu við þjónustuhúsið ásamt götulýsingu undir brúnum

Nöfn á helstu hverum eru skorin út í gegnum kortenstálplötur sem felldar eru í göngustíginn og eru hluti af honum.

Timburstígarnir eru bornir uppi af steypueiningum sem liggja á yfirborðinu en eru ekki grafnir í jörðu. Þannig má auðveldlega færa þá til.

Setbekkir á svæðinu verða einfaldir, látlausir og úr skógarviði úr nágrenninu.

Áfangaskipting
Skipulagstillöguna má framkvæmaí nokkrum áföngum:

1. Leggja stígakerfið innan hverasvæðisins og skapa hringrás.
2. Færa bensíndælu og fækka innkeyrslum að þjónustusvæði.
3. Taka alla bílaumferð burt fyrir framan þjónustubyggingu og skapa torg, sem markar sér leið yfir þjóðveginn að nýju hringleiðinni.
4. Byggja veginn sunnan við þjónustubyggingu, þegar íbúðarhús flyst.
5. Lækka þjóðveginn, byggja brýrnar. Leiða má umferð um nýja veginn á meðan.

Ingólfstorg

DLD í samstarfi við A2F arkitekta tók þátt í samkeppni Reykjavíkurborgar árið 2012 um hönnun hótels og skipulags Ingólfstorgsreitsins

INGÓLFSTORG – KVOSIN
greingargerð með tillögu

“Höfuðból í hjarta borgar”

Inngangur

Við erum stödd á einu merkasta sögusviði borgarinnar, þar sem Ingólfur nam land, hér myndaðist fyrsta gatan í borginni. Jafnvel garðsagan á sitt upphaf hér, þar sem enn standa elstu tré borgarinnar. Sannkallað Höfuðból. Svæðið er hins vegar sundurlaust og án tenginga við umhverfi sitt, torgrýmin illa nýtt, og slæm tengin þeirra á milli. Ingólfstorg er eyja skorin frá umhverfinu með bílum. Saga Víkurgarðs er óljós nema þeim sem til þekkja. Gömul falleg hús standa við ljóta brunagafla.

Hönnun nýs hótels á svæðinu og breytingar á Ingólfstorgi og Víkurgarði fela í sér tækifæri til að binda aftur saman sem sundur var slitið.

Markmið

Markmiðið er að almenningsrýmin í Kvosinni myndi saman sterka heild, dragi fram staðarandann og auki aðdráttarafl þess. Hótelið beri með sér sýn til framtíðar, það lagi sig að þeim byggingum sem fyrir eru og virði sögulegt samhengi þeirra, en taki jafnframt þátt í að flétta saman og móta bæjarrýmið. Söguleg arfleifð og menning séu virt og gerð aðgengileg og læsileg almenningi. Að bíllinn víki úr sessi fyrir auðugra mannlífi, þar sem, gangandi og hjólandi vegfarendum er gert hátt undir höfði.

Umhverfi og skipulag

Í skipulaginu er lögð áhersla á flæði gangandi og hjólandi milli svæða og tengja bæinn aftur við höfnina, þar sem hjartað í borginni slær í augnablikinu.

Garðrými og torg á skipulagssvæðinu:

1. Ingólfstorg – lítið vel afmarkað borgartorg. Torg sem skartar framsækinni hönnun með áherslu á íslenska nálgun og efnivið.
2. ”Vesturtorg – Siemsentorg” – nýtt torgrými í borginni, eftir tilfærslu Siemsenhússins frá Tryggvagötu, torgið verður hluti af flæði frá Ingólfstorgi í átt til sjávar.
3. Víkurgarður – sögusviði ýmissa minja frá upphafi byggðar.
4. Austurvöllur – miðborgargarðurinn, vel afmarkaður, tenging við veitingastað, sólríkur skjólgóður, grænn, rými fyrir stóra hópa til að fagna eða mótmæla.
5. Gamli Alþingisgarðurinn – kyrrlátt frekar lokað rými.
6. Nýi Alþingisgarðurinn – nýtt garðrými sem tengist gönguleiðum Kvosarinnar. Kyrrlátt rými með grænu virðulegu yfirbragði.

Auk þessara skipulagshugmynda mætti hugsa sér að Aðalstræti 9 hýsti listamenn og erlenda rithöfunda og bókasafn íslenskra verka á öllum útgefnum tungumálum. Þakflöturinn yrði útfærður sem garðsvæði.

Landsímahúsið væri með lifandi starfsemi á jarðhæðinni og opnaðist á móti Austurvelli

Umferð

Aðalstræti til vesturs, Hafnarstrætis til norðurs, Pósthússtræti til austurs verður bílfrítt svæði, fyrir utan þjónustu að morgni. Leyfilegt verður að læðast í gegnum Kirkjustræti á forsendum gangandi umferðar, en einungis rútur og leigubílar mega staldra þar við á merktum stæðum.
Pósthússtræti og sundin að höfninni verða göngugötur. Gamli hafnarkanturinn í Pósthússtræti verður gerður sýnilegur með áherslu á göngutengsl að Hörpu. Gamla strandlínan verður dregin fram í gegnum kvosina. Tryggvagata verður einstefna til austurs með bílastæðum skuggamegin í götunni.
Fyrir framan listasafnið er gert ráð fyrir rútustæði og leigubílum.

Frá Ingólfstorgi að Víkurgarði

Ingólfstorg

Meginhugmynd torgsins er að vekja hughrif með stíliseraðri náttúru. Stöllun torgsins myndar eins konar landslag og skapar spennandi setsvæði í leiðinni. Torgið flæðir inn á við í þægilegum halla og skapar þannig aðgengi fyrir alla. Rammi torgsins eru byggingarnar með vegleg dvalarsvæði sem skapa mannlíf á torginu. Aðgengi að húsum er leyst í uppbroti yfirborðsins og stallarnir fela í sér leikmöguleika m.a fyrir brettakrakkana.

Vatn í mismunandi formi mun leika stórt hlutver á torginu.

Regnvatn mun renna í sýnilegum rásum að skósólaþunnum vatnsfleti, sem speglar birtu himinsins. Hringrás vatns í lækjarsprænu mun skapa þægilegan nið, þegar setið er í stöllunum.

Torgið verður snjóbrætt fyrir utan hæðirnar sem koma upp úr, þar sem snjór mun sitja lengur og skapa árstíðabundna stemmingu, ásamt trjám og gróðri á torginu.

Heita vatnið fær að njóta sín með nýjum hætti. Nokkur setsvæði á torginu verða upphituð og við eitt þeirra verður fótabað með nuddmöguleika. Þessi nálgun er skýrskotun til nafnsins Reykjavík og endapunktsins á Laugavegi og lauganna í Laugardal.

Fínn úði frá yfirborði líkur gufu skapar dulúðuga stemmingu á völdum stöðum.

Torgið opnast sem bjart og sólríkt í andstæðu við skuggsælt Austurstrætið, ljóst yfirborðsefni mun ýkja þá upplifun. Í efnisvali munu einnig timburbjálkar skírskotað til gömlu bygginganna og bryggjanna. Hugsa mætti sér að mynstra í flötinn á einum stað öndvegissúlurnar eins og þær hafi nýlega rekið á land.

Lýsingin verður lágstemmd en þó verður hægt að skapa mismunandi stemmingu yfir vetrartímann.

Á suðurhluta torgsins mun hótel Höfuðból rísa um 100 herbergja hótel á 3,5 til 4 hæðum. Það lagar sig að þeirri byggð sem fyrir er og bindur saman gamalt og nýtt og tengir torgsvæðin saman með leiðandi veggjum á jarðhæð. Hótelið er eins og smækkuð útgáfa af borg með götum, görðum og torgi. Það endurspeglar þann byggingastrúktur sem er í Grjótaþorpinu og talar í efnisvali, uppbroti og þakformi við gömlu húsin á svæðinu.

Aðalstræti 7 er flutt norðar í götuna og myndar nú skemmtilegt rými með hótelinu og húsunum við Veltusund. Í þessu rými verður útfært grænt setsvæði sem janframt nýtist sem svið á móti torginu.

Víkurgarður

Víkurgarður var kirkjustæði um tíma og kirkjugarður frá 900-1838, en fékk þá hlutverk skrúðgarðs aðeins 45 árum eftir að síðasti maður var jarðaður. Í garðinum stendur eitt elsta tré borgarinna gróðursett 1883. Í tillögunni er lagt til að þessi saga verði gerð sýnilegri. Tillaga Teiknistofunnar (Bautasteinn, 1. tbl., 7. árgangur, apríl 2002) um að opna aðgengi að landnámssýningunni undir Aðalstræti er nýtt í breyttri mynd. Kirkjustæðið verður grafið upp og gert sýnilegt. Að hluta til svífur torgið yfir rústunum, en rampi leiðir niður að innganginum. Falleg lýsing verður á gryfjunni og myndir af kirkjunni á veggnum á móts við innganginn. Húsið við Vallastræti 4 mun standa í garðinum við Kirkjustræti og styrkja götumyndina þar og ljá garðinum eldra yfirbragð sem hæfir honum. Í garðinum verður útfærsla sem vekur minningar um gamla þúfnakirkjugarðinn, þar sem 30 jarðsettra kynslóða er minnst. þessar þúfur munu þó einnig þjóna sem sæti og leikur fyrir börn. Núverandi minnisvarðar verða staðsettir á móts við kirkjustæðið.

Hótel Höfuðból
Innra skipulag

Kjallari
Gert er ráð fyrir að skemmtistaðurinn Nasa verði fluttur niður um eina hæð óbreyttur með upprunalegum innréttingum. Áður en framkvæmdir hefjast mun rannsókn fara fram um hvort fornminjar leynist á svæðinu, ef svo reynist mun Nasa standa óhreyft en verslanir á jarðhæð víkja.

Í kjallara undir veitingastað er eldhús og starfsmannaaðstaða. Spa og líkamsrækt er þar einnig sem aðgengilegt verður bæði gestum hótels og almenningi, eina slíka þjónustan í næsta nágrenni. Nasa mun tengjast daglegum rekstri sem t.d ráðstefnusalur og tvískiptur fjölnota salur tengir Nasa við hótelilð. Ipod verkið ”Nasasjón”, á inngangstorginu gefur innsýn í íslenska tónlistarflóru.

Jarðhæð
Á jarðhæð er móttaka og öll þau rými sem nauðsynleg eru hótelrekstri, en rík áhersla er lögð á starfsemi sem tengist bæjarlífinu með beinum hætti, svo sem kaffihús/ bar, matsalur og verslanir sem opnast út í almenningsrýmin.

Efri hæðir
Á efri hæðum eru herbergi hótelsins. Þau snúa flest út á Ingólfstorg, en hluti þeirra snýr að Aðalstræti, annar að Austurvelli þriðji að innri garðrýmum. Aðalgangrýmið tengist sjónrænt Bröttugötu Grjótaþorpsins og Vallarstræti við Austurvöll. En á jarðhæð eru þessi göngutengsl í gegnum bygginguna. Í umferðarrýmum er útsýni út á Austurvöll, Grjótaþorp, Víkurgarð, Aðalstræti og innri garða. Sólrík sameiginleg verönd snýr í átt að Austurvelli.

• Efnisval og vistvæn hönnunHlutar útveggja eru með timburklæðningu sem er hlýlegt og vistvænt efni og jafnframt skírskotun í gamlar byggingar. Á jarðhæð er gert ráð fyrir gleri í fassöðu.
• Vistvæn hönnun er höfð að leiðarljósi við hönnun hótels, torga og garða. Til þess að spara orku verður dagsbirta nýtt eins mikið og hægt er í umferðarrýmum. Gert er ráð fyrir gróðurþaki, sem er jákvætt fyrir fuglalíf og er hljóðdempandi, gagnvart t.d flugvélum, einnig minnkar það álag á niðurfallskerfi.

Framtíðarsýn

Í þessu umdeilda verkefni að byggja hótel á þessum sögufræga stað eru tækifæri, sem felast í að tengja saman sögusviðið og bæta gæði borgarrýmanna með aðferðum nútíma byggingarlistar og umhverfishönnununar. Fyrir utan að færa borginni nýtt og spennandi innihald á Ingólfstorgi stækkar nýtilegt svæði frá því sem nú er. Ingólfstorg ásamt aðgengi að sögu Reykjavíkur í Víkurgarði og Hótel Höfuðból mynda saman heild sem kemur til með að styrkja hjarta Reykjavíkur um ókomna tíð.

Brýr við Elliðaárvog

Tillaga DLD og samstarfsaðila í samkeppni Reykjavíkurborgar um  göngu -og hjólabrýr við Elliðárvog árið 2012.
Arkitetkar: A2F arkitektar
Verkfræðingur: Sigurður Gunnarsson

Laxaganga með brúa-sporðaköstum
Greinargerð með tillögu

Inngangur
Svæðið sem um ræðir er ein af náttúruperlum Reykjavíkur, upphaf eða endapunktur Elliðaárdalsins, sem er einstakur fyrir margar sakir m.a fyrir gjöfula laxveiðiá í miðri borg.
Geirsnefið er manngert og hefur verið mikið inngrip í vistkerfi fjörunnar og árósanna á sínum tíma. Í dag er mikið fuglalíf, sérstaklega við vestari ósinn, þar sem fjarar langt upp í hann og stórir hópar fugla koma þar í ætisleit. Eystri kvíslin er sú leið sem laxinn velur upp í árnar og er hann að ganga frá júní til september.
Mikill fjöldi fólks með hunda notar Geirsnefið í dag enda er það eina hundaviðrunarsvæði borgarinnar þar sem leyfilegt er að sleppa hundum lausum. Í Aðalskipulagi Reykjavíkur er svæðið austanmegin við árnar merkt sem blönduð byggð og ekki er ólíklegt að svæðið vestan við árósana verði síðarmeir íbúðabyggð.
Vænta má í því samhengi að Geirsnefið verði í framtíðinni enn mikilvægara sem útivistarsvæði í nágrenni þéttrar íbúðabyggðar.
Meginhugmynd og áherslur
Heildarmynd tillögunnar er tilvísun í laxagöngu með sporðaköstum, þar sem uggarnir eru áningastaðirnir.
Grunnhugmynd tillögunnar er að aðgreining hjólaleiðar og gangandi myndi þræði í vef sem sameinast yfir brýrnar sem í planlegu kvíslast um eins og áreyrar. Stígarnir fylgja landinu í hæð í mjúkum bylgjum, sem þó uppfylla fremstu kröfur um hámarkshalla.
Brúin er hluti af þessu landslagi, hún er óður til laxinns, þar sem hún svífur létt yfir árnar í mjúkum boga eins og búkur fisks og burðarvirkið minnir á beinagarð.
„Brúa-sporðaköst“ gæti verið heitið á því sem gerist á Geirsnefinu á milli brúnna. Þar er hjóla- og gönguleiðin aðgreind í hæð og „uggarnir“ áningastaðirnir felldir inn í landslagið, ýmist til suðurs eða í útsýnisátt til sjávar. Hérna tengjast líka gönguleiðir á Geirsnefinu við brýrnar, en núverandi leið fer óhindruð undir þær.
Göngu –og hjólaleiðirnar tengjast núverandi stíganeti austan og vestan megin við árnar, en einnig væri mjög áhugavert að skoða tengingu í átt að Kleppsmýrarvegi yfir voginn þar sem hann er mjóstur frá Snarfara svæðinu, til að stytta leiðina meðfram sjávarsíðunni og njóta lengur náttúrunnar á þessari leið.
Ef Geirsnefið á að nýtast sem hundaviðrunarsvæði um óákveðinn tíma, væri hugsanlegt að girða við brekkurótina á móti suðri og hafa hlið þar sem stígarnir tengjast svæðinu.
Með breyttri landnotkun eins og gefið er til kynna í Aðalskipulagi myndu stígarnir og brýrnar einnig falla vel að bæjarmynd og umhverfi .

Vefurinn – brú, stígur, áning
Nálgun og flæði
Óður til laxins, léttleiki, einföl uppbygging, fljótleg í uppsetningu, og framkvæmd sem veldur hvað minnstu raski á staðnum, er megin hugsunin í hönnun brúnna. Flæðið yfir þær hafa ólíkar áherslur, annars vegar umferðaráhersla hins vegar útivistargildi. Áherlsan fyrir hjólastígana er rúmir beygjuradíusar og þægileg planlega í mjúkum bylgjum, þar sem hægt er að halda ákveðnum hraða án hindrana. Stígarnir að brúnni eru vel aðgreindir og forðast að vera með þveranir á hjólaleiðina.

Staldrað um stund
Gönguleiðin er með áherslu á útivistargildið, áherslumunur yfir brýrnar er t.d í handriðinu, þar sem göngustígs megin er handriðið lægra og gert ráð fyrir að hægt sé að halla sér fram á það og horfa ofan í ána. Hugsa mætti sér að austanmegin yrði komið fyrir sjónpípu ofan í ána til að fylgjast með laxinum, en að vestanverðu gæti verið staðsettur kíkir fyrir fuglaskoðun. „Uggarnir“ áningastaðirnir á Geirsnefinu eru felldir inn í landið þannig að bakstuðningur er í brekkunni, þar sem kantur styður við setsvæðin og hægt er að tylla sér niður sunnan megin í sólinni eða í norð austur með útsýni yfir sjóinn og Esjuna. Tré og gróður skapar skjól og hlýlega stemmingu fyrir þá sem velja að staldra þar við.
Á sama svæði neðar í plani er einnig áning fyrir hjólandi umferð, til að staldra við og virða fyrir sér útsýnið. Áningin er útsýnisstallur sem er afmarkaður með handriði sömu gerðar og brúnna.

Bygging brúar
Form og framkvæmd
Brýrnar spanna annars vegar 38m yfir austur kvíslina, en 52m yfir þá vestari, breiddin í miðju er 4,5m en víkkar hún út til endanna í 6m, þar sem leiðirnar byrja að aðskiljast. Handriðin eru hjólamegin 1,4m há, en gönguleiðarmegin eru þau 1,2m.
Þar sem bæði gangflötur og togband mynda boga er um náttúrulegt form eða svokallaðan „minimal-strúktúr“ að ræða. Vegna þessa er brúin í eðli sínu bæði mjög létt og stíf. Fyrir utan hin jákvæðu áhrif sem þetta hefur á lækkun byggingarkostnaðar þá einfaldar þetta einnig uppsetningu brúarinnar til muna því vel má hugsa sér að byggja brúnna á verkstæði og hífa hana í einu lagi á brúarstæðið.

Grundun og inngrip
Við val burðarkerfis var lögð megin áhersla á einfalt og skýrt kerfi. Bogi brúarinnar er gerður úr einföldum jafnstórum forsteyptum einingum og myndar þrýstingur bogans einfalt jafnvægi við bogastrenginn. Í raun eins og örvabogi þar sem mörgum örvum er miðað samtímis. Vegna þessa jafnvægis er grundun brúarinnar mun einfaldari og minna inngrip en ef þrýstingur bogans glennti sig inn í sitt hvorn árbakkann.
Viðhald og eftirlit
Þar sem brúardekkið er alltaf undir þrýstingi myndast nánast engar beygju eða togsprungur í steinsteypunni og viðhaldskostnaður er því í algeru lágmarki. Auðvitað þarfnast bogastrengurinn venjulegs eftirlits en það er mjög einfalt og takmarkað að umfangi – eins og strengurinn sjálfur.

Efnisval
Litir og áferðir
Gert er ráð fyrir að hjólaleiðin verði malbikuð í rauðum lit til aðgreiningar frá gönguleið og að forsteyptar einingar á hjólaleiðinni yfir brýrnar verði með ryðguðum stálflögum til að gefa rauða litaáferð yfir brýrnar.
Á göngu og hjólaleiðinni næst brúnnum verða steyptar rendur sömu áferðar og brúnna í ákveðnum takti til að gefa til kynna að leiðir sameinist og brúin sé framundan. Sömuleiðis verður leikið með þessa áferð á áningastöðunum.
Handriði brúnna er úr cortenstáli en handlistar eru úr íslensku lerki sem fær að grána. Handlistinn á brúnni göngustígsmegin býður upp á að staldrað sé við og hægt sé að halla sér upp að honum.
Lerkið verður einnig notað í útfærslum á setsvæði í samspili við kortenstál og forsteyptar einingar. Áhrifin í efnisvalinu eru sótt úr umhverfinu, í hafnarmannvirki og iðnað ásamt nátúrunni sjálfri.

Lýsing
Yfir brýrnar verður led-lýsing undir handlistum sem beina jósinu á brúardekkið án þess að lýsa ofan í ána.
Mikilvægt er að góð lýsing sé á hjólaleiðinni þar sem hún þjónar umferðaleið. Gert er ráð fyrir að hefðbundir ljósastaurar séu á leiðunum að brúnum, en lýsingin verði lægri og felld að útfærslum á áningastöðum og brúm þar sem hún fer yfir Geirsnefið

Lokaorð
Með tengingu yfir ósana opnast fyrir nýtt flæði gangandi og hjólandi ekki bara yfir ósana heldur einnig að útivistarleiðum í Elliðaárdalnum. Framkvæmdin mun því öðlast enn meira gildi með breyttum áherslum á landnotkun og uppbyggingu nágrannasvæðisins sem íbúðabyggðar. Brýrnar eru því upptaktur að fegrun og uppbyggingu svæðisins, með vellíðan borgarbúa í huga ekki síst með bættum hjólasamgöngum.